इम्बोस्ड नम्बर प्लेट जनताको आवश्यकता हैन , यदि यातायातले लागुनै गर्ने भए शुल्कबिना  पुरानो प्लेटलाई आफै घरघरमा आएर फेर्नु-

यातायात व्यवस्था विभागले साउन १ गतेदेखि अनिवार्यरुपमा इम्बोस्ड नम्बर प्लेट जडान गरेको हुनुपर्ने भनेर सूचना जारी गरेसँगै यतिबेला यातायात व्यवस्था कार्यालय, गुर्जुधारामा मोटरसाइकलमा इम्बोस्ड नम्बर प्लेट जडान गर्न जानेहरूको घुइँचो छ । सोमबार कार्यालय खुलेदेखि लाइन बसेका सेवाग्राहीहरू सोमबार साँझ ७ बजेसम्म पनि पालो नआएपछि दर्ता मात्रै गराएर घर फर्किन बाध्य भए ।

सोमबार दर्ता मात्रै गराएका सेवाग्राहीले मंगलबार दिउँसो एक बजेको आसपासमा मात्रै सबै प्रक्रिया पूरा गरी इम्बोस्ड नम्बर प्लेट पाए । सोमबार कार्यालय समयमा लाइन लागेकाहरुले मंगलबार अपरान्ह मात्रै इम्बोस्ड नम्बर पाउँदा मंगलबार पनि इम्बोस्ड नम्बर प्लेटका लागि लाइनमा बस्नेहरूको घुइँचो देखिन्थ्यो ।

इम्बोस्ड नम्बर प्लेट प्राप्तिका लागि अनलाइन्बाटै फारम भरेपछि त्यहाँ तीनवटा लाइन हुन्छ । एउटा भेरिफिकेशन गर्ने, अर्को दर्ता किताबमा नयाँ इम्बोस्ड नम्बर उल्लेख गर्ने र तेस्रो इम्बोस्ड नम्बर प्राप्त गरेपछि जडान गर्ने र फोटो खिचेर सिस्टममा अपलोड गर्ने । त्यसपछि मात्रै इम्बोस्ड नम्बर प्लेट जडानको काम सकिन्छ ।

सरकारले पाँच वर्ष पहिलेदेखि नै सबै सवारीसाधनमा इम्बोस्ड नम्बर प्लेट अनिवार्य गर्ने घोषणा गरेको भए पनि सर्वोच्च अदालतमा भाषाको विवादमा मुद्दा परेपछि करिब ३ वर्ष रोकियो । गत वर्ष सर्वोच्च अदालतबाट अङ्ग्रेजी भाषामै इम्बोस्ड नम्बर प्लेट छपाई गर्न पाउने फैसला भएपछि काम सुरु भए पनि सेवाग्राहीले त्यसमा कुनै इच्छा देखाएनन् ।

तर सरकारले ६ वर्षअघि २५ लाख थान सवारीसाधनमा इम्बोस्ड नम्बर प्लेट जडान गर्ने भनेर गरेको ठेक्काको समय सकिनै लाग्दा ठेकेदार कम्पनीले दबाब दिएपछि यतिबेला यातायात व्यवस्था विभागले सूचना नै निकालेर असार मसान्तसम्मको समय दिएर इम्बोस्ड नम्बर प्लेट जडान गर्न सेवाग्राहीलाई सूचना जारी गरेको थियो ।

इम्बोस्ड नम्बर प्लेट जडान गर्नका लाग पैसा खर्च गरेर मात्रै हुँदैन छिटोमा पनि एक दिनको पुरै समय इम्बोस्ड नम्बर प्लेटकै लागि खचिनुपर्छ । बिहान ९ बजे यातायात कार्यालय पुगेर लाइनमा बसेका सेवाग्राहीले छिटोमा सोही दिनको ५ बजेतिर मात्रै इम्बोस्ड नम्बर प्लेट प्राप्त गर्न सकेका छन् । ठेकेदार कम्पनीले न्यून कर्मचारी मात्रै उपलब्ध गराउँदा र पर्याप्त सरकारी कर्मचारी पनि नहुँदा इम्बोस्ड नम्बर प्लेट वितरणमा ज्यादै समस्या भएको यातायात व्यवस्था कार्यालयले जनाएको छ ।

प्रतिक्रिया

सम्बन्धित खवर

ताजा समाचार

लोकप्रिय