काठमाडौं । हलिउडका चर्चित गायक जस्टिन बिबर छुट्टी मनाउन गएका छन् । लगातार कन्सर्ट गर्ने जस्टिनले अहिले आफ्नो शरीरलाई केही समय आराम दिइरहेका छन् । यसको कारण हो – उनी दुर्लभ रोगबाट पीडित छन् । जस्टिन बिबरले सामाजिक सञ्जालमा एउटा भिडियो शेयर गर्दै आफूलाई रामसे हन्ट सिन्ड्रोम भएको बताए । जसका कारण उनको आधा अनुहारमा पक्षाघात भएको छ । इन्स्टाग्राममा आफ्नो एक भिडियो सेयर गर्दै जस्टिन बिबरले आफ्नो कन्सर्ट शो रद्द गर्नुको कारण फ्यानलाई बताए ।

भिडियोमा जस्टिन भन्छन्, ‘मलाई यो रोग भाइरसका कारण लागेको हो, जसले मेरो काम र अनुहारको नसामा आक्रमण गरिरहेको छ । जसका कारण मेरो अनुहारको एक छेउमा पूरै पक्षघात भएको छ । तपाइँहरु देख्न सक्नुहुन्छ कि मेरो एउटा आँखा झिम्किरहेको छैन। म यस तर्फबाट मुस्कुराउन पनि सक्दिन र मेरो नाक यतातिर चल्दैन।’



जस्टिन बिबरका केही फ्यानहरू उनको आगामी शो रद्द भएपछि निकै आक्रोश पोखेका थिए । उनलाई सन्देश दिँदै जस्टिनले अहिले स्टेजमा शारीरिक रुपमा प्रस्तुति दिन नसक्ने बताएका छन् । चिकित्सकले उनलाई आराम गर्न भनेका छन् ।

भिडियोमा उनले यसबारे भनेका छन्, ‘यो कुरा एकदमै गम्भीर छ, तपाईले देख्न सक्नुहुन्छ । म चाहान्छु कि यो नहोस् तर मेरो शरीरले मलाई अलिकति आराम गर्न भन्यो। मलाई आशा छ कि तपाईहरुले बुझ्नुहुनेछ र म यो समय आराममा बिताउनेछु ताकि म १०० प्रतिशत निको भएर फर्केर आउन सकुँ ।

रामसे हन्ट सिन्ड्रोम एक दुर्लभ न्यूरोलोजिकल रोग हो। यसमा, कान वरपर, अनुहार वा मुखमा पीडादायी दागहरू निस्कन्छन्। यसबाहेक बिरामीको अनुहारमा पक्षाघात पनि हुन सक्छ। यसले कानमा बहिरोपनको गम्भीर समस्या पनि निम्त्याउन सक्छ। यो दुर्लभ रोग भेरिसेला-जोस्टर भाइरसले टाउकोको नसामा संक्रमण गर्दा हुन्छ। यो भाइरसले बच्चाहरूमा चिकनपक्स र वयस्कहरूमा दादुरा पनि निम्त्याउँछ।

जस्टिनले आफ्ना प्रशंसकहरूलाई उनको समर्थनको लागि धन्यवाद दिए। साथै उनले आफु निको भएर छिट्टै फर्कने वाचा समेत गरेका छन् । जस्टिनले आफ्नो अनुहार फेरि सामान्य बन्नका लागि डाक्टरले तोकेबमोजिम फेसियल एक्सरसाइज गरिरहेको बताए । कति समय लाग्छ थाहा छैन तर भगवानमाआस्था रहेको उनले बताए । जस्टिन बिबरका फ्यान र हलिउडका चर्चित सेलिब्रेटीहरूले भिडियोमा प्रतिक्रिया दिँदै उनको शीघ्र स्वास्थ्यलाभको कामना गरिरहेका छन् ।